Түрк мамлекеттер уюму бажы тармагындагы кызматташтыкка өзгөчө маани берип келет. Бул багытта Уюмдун алкагында Бажы башкармалыктарынын башчылары 8 ирет жолугушуп, ал эми бажы маселелери боюнча жумушчу топ 11 жолу чогулган. Мүчө мамлекеттер жана Грузия үчүн Түркия Республикасынын Соода жана Бажы министрлиги тарабынан ыйгарым укуктуу экономикалык оператор системасы, бажыдан кийинки текшерүү жана тобокелдикти талдоо боюнча үзгүлтүксүз машыгуулар өткөрүлүп турат. 2015-жылдын февраль айында Брюссел шаарында Түрк мамлекеттер уюмунун жана Дүйнөлүк бажы уюмунун (ДБУ) Башкы катчылары тарабынан «Бажы кызматташтыгы боюнча өз ара түшүнүшүү жөнүндө меморандумга» кол коюлган. Мындан тышкары, ДБУнун Башкы катчысы 2015-жылдын июль айында Бишкек шаарында өткөн Бажы башкармалыктарынын башчыларынын 4-жыйынына катышып, кызматташтыкты чыңдоого салым кошкон.