Turkiy davlatlar tashkiloti (TDT) bosh kotibi, elchi, Kubanichbek O’muraliyev O'zbekistonga tashrifi doirasida Toshkent davlat sharqshunoslik universitetiga (TDSHU) tashrif buyurdi.

Tashrif davomida Bosh kotib O’muraliyev TDSHU rektori Gulchehra Rixsiyeva bilan uchrashdi. Uchrashuv davomida ular ta'lim sohasidagi hamkorlikni kengaytirish va Turkiy davlatlar o'rtasida akademik sheriklikni mustahkamlash masalalarini muhokama qilishdi. 

Tomonlar Turkiy davlatlar o'rtasida ta'lim sohasidagi hamkorlikni kuchaytirish muhimligini ta'kidladilar va Turkiy universitetlar ittifoqining “O’rxun almashinuv dasturi” doirasida qo'shma loyihalar va dasturlar sonini ko'paytirishga kelishib oldilar.

Bosh kotib shuningdek, "Turkiy davlatlar tashkiloti doirasidagi hamkorlikning hozirgi holati va rivojlanish istiqbollari" nomli konferensiya o'tkazdi. U o'z nutqida Turkiy davlatlar o'rtasidagi munosabatlarni chuqurlashtirishda ta'lim va madaniyat sohasidagi hamkorlikning ortib borayotgan rolini ta'kidlab o’tdi.