Azərbaycan Respublikası Xarici İşlər Nazirliyinin “Diplomasiya Dünyası” jurnalı Türk Şurası Katibliyi ilə əməkdaşlıq çərçivəsində Türk Şurasının Azərbaycan Sədrliyinə həsr olunmuş xüsusi buraxılış nəşr etmişdir.
Buraxılış Türk Şurası haqqında ümumi məlumat, onun hüquqi çərçivəsi, əməkdaşlıq sahələri, Azərbaycan Respublikası ilə əlaqələri, həmçinin beynəlxalq və regional təşkilatlarla münasibətləri əhatə edir.
Jurnalda Baş Katib Bağdad Amreyevin və Türk Şurasının əlaqəli və bağlı təşkilatlarının digər rəhbərlərinin məqalələri də yer almışdır.
Baş Katib Amreyev özünün “Azərbaycan Sədrliyi Dönəmində Türk Şurasının Artan Təsiri” adlı məqaləsində Azərbaycan Sədrliyi dövründə Türk Şurasının fəaliyyətlərinə, xüsusilə 15 oktyabr 2019-cu ildə Azərbaycanda keçirilən Türk Şurasının 7-ci Zirvəsinin nəticələrinə, eləcə də Türk Şurasının tarixində ilk dəfə 10 aprel 2020-ci ildə Azərbaycan Respublikasının Prezidenti, cənab İlham Əliyevin təşəbbüsü ilə “COVID-19 pandemiyasına qarşı mübarizədə həmrəylik və əməkdaşlıq” mövzusunda keçirilən Fövqəladə Zirvəyə işıq salır.
Baş Katib həmçinin qeyd edir ki, Türk Şurası və Türk Dünyası hər zaman Azərbaycanın mövqeyini və ərazi bütövlüyünü dəstəkləmiş, Ermənistan silahlı qüvvələrinin Azərbaycanın işğal olunmuş ərazilərindən dərhal, qeyd-şərtsiz və tamamilə çıxarılmasını tələb etmiş, mülki şəxslərə qarşı hücumları kəskin şəkildə pisləmiş və 44 günlük Vətən Müharibəsi zamanı Azərbaycanın yanında olmuşdur.
Baş Katib sonda yekunlaşdırır ki, 2020-ci ildə Türk Şurası və Üzv Dövlətlərin təhlükəsizlik və ictimai səhiyyə təhdidlərinə cavabı Türk Dünyasının birgə yanaşmasını və beynəlxalq böhranlara və çağırışlara sürətli reaksiyasını nümayiş etdirmişdir. Bu kontekstdə, ümumi təhdidlərə qarşı birləşmiş səs və regional həmrəyliyin artan rolu təşkilatın regional və qlobal sülh və sabitliyə mühüm töhfə verən bir qurum kimi rolunu gücləndirmişdir.
Yüklənə bilən PDF faylı aşağıda verilmişdir.

Azərbaycan XİN-in “Diplomasiya Dünyası” Jurnalının Xüsusi Buraxılışı

Rəsmi sosial media hesabları: